МИСИЈА
Здружението за заштита на животните и животната средина Е.Д.Е.Н. (Единство Достоинство Емпатија Натурализам) е доброволно, непрофитно, здружение на граѓани, формирано за да ја подигне јавната свест за специзмот/видизмот и еколошката (не)култура и да ги поттикне граѓаните да прифатат вегански стил на живеење.
ВИЗИЈА
Крајна цел на Е.Д.Е.Н. е целосно искоренување на злоупотребата и експлоатацијата на животните и животната средина во секој домен од човековото живеење. Целиме кон создавање на општество каде што интегритетот и достоинството на животните и животната средина ќе бидат еднакво почитувани и уважувани од страна на човекот, бидејќи ненасилството кон животните и животната средина доведува до искоренување на насилството меѓу луѓето.
Е.Д.Е.Н. верува дека правото на живот и слобода на секое живо суштество му припаѓа по раѓање и дека никој не смее да му го одземе тоа право.
Е.Д.Е.Н. верува дека правото на чист воздух, чиста вода за пиење и чиста животна средина им припаѓа на сите живи суштества што ја населуваат оваа планета. За постигнување на целите предвидени со мисијата Е.Д.Е.Н. ќе ги предочува и истакнува придобивките од животен стил кој не подразбира свирепост кон и злоупотреба на ниедно друго живо суштество. На тој начин ќе стимулираме поодговорен однос кон планетата, што ќе доведе до подобрување на здравствената состојба кај човекот и унапредување на етиката и емпатијата. Преку поттикнување на посовесна и еволуирана перцепција на животните и животната средина човечката раса се издигнува на повисоко ниво.
ГЛАВНИ ОБЛАСТИ НА ДЕЛУВАЊЕ НА Е.Д.Е.Н.
Работа на терен
- Акции за спасување на бездомни и злоупотребени животни и наоѓање безбедни привремени и/или трајни домови за истите
- Истражување експлоатација на животни на фарми, во кланици, циркуси и разни други институции и претставување на реалната слика пред јавноста
- Мирни протести за привлекување на вниманието на јавноста за правата на животните и животната средина
- Настани за собирање средства за директна помош на секаков вид експлоатирани и повредени животни: животни-жртви на каков било вид катастрофи, животни во завојувани подрачја и животни изложени на секаква друга опасност од повреда или смрт
- Спроведување проекти на локално, национално и меѓународно ниво во согласност со мисијата и визијата на Е.Д.Е.Н.
Институционално делување
- Кривично гонење на поединци, групи и/или институции одговорни за кршење на законите кои ги штитат животните и животната средина
- Влијаење врз законодавните тела за подобрување на законите кои се однесуваат на животните и животната средина, вклучително лобирање на локално, национално и меѓународно ниво
- Надгледување на работата на институциите при спроведување на законите кои се однесуваат на животните и животната средина и соработка со истите
- Соработка со меѓународни законодавни тела и институции
- Соработка со останати сродни и поврзани организации на локално, национално и меѓународно ниво
Едукација на јавноста
(преку делење летоци, информативни штандови, дебати, трибини, предавања, работилници, културно-уметнички настани, иницирање петиции, медиумско влијание и онлајн активизам)
- Подигање на свеста кај граѓаните за специзмот/видизмот
- Подигање на свеста кај граѓаните за бездомните животни
- Подигање на свеста кај граѓаните за четирите најзлоупотребувани категории на животни: фармски, експериментални, жртви на модната и на индустријата за забава
- Подигање на свеста кај граѓаните за заштитените и загрозените видови животни и видовите кои се жртви на трговија и загрозување
- Промоција на вегански животен стил
- Подигање на свеста кај граѓаните за непоправливата штета која произлегува од уништувањето на животната средина
- Создавање еколошка култура
Категории на животни опфатени со активностите на Е.Д.Е.Н.:
- бездомни
- фармски
- експериментални
- модна индустрија (облека, обувки, мебел)
- индустрија за забава (циркуси, филмови, фото-студија…)
